Trachtegruppe Herzogebuchsi und Umgäbig

D‘ Fröid isch gross gsi, wieder ä mou öppis gmeinsam ungernäh.

Am 12. Septämber hei mir üs troffe zu üsere Vereinsreis. Auso si mir i üses schönschte Chleid gschlüpft, wie sich das ghört, i üsi Tracht. Äs het eim fasch Träne füre drückt nach so langer Zit die Viufaut wieder mou in Natura chönne z‘ gseh.

Der Carchauffeur het üs dürs schöne luzärner Hingerland gfüehrt. In Luzärn acho si mir umstige ufs Schiff. Nachere eistündige Fahrt hei mir Vitznau erreicht. Dört isch üs gnüegend Zit zur verfüegig gstange, sig das zum Flaniere am schöne Seeufer entlang, oder Picknick, ässe und trinke im ne Gartebeizli, efach das mache wo jedes Luscht het.

Am Obe het üs der Carchauffeur wieder gsung und munter hei brocht. Zum krönende Abschluss hei mir üs no äs feins Znacht im Chrüz in Oberönz gönnt und aui si zfride und glücklech zu ihrne liebschte hei gange.

Text und Fotos: Irene Sommer im Septämber 2021