Sing- und Tanztäg z'Kanderstäg 28. Septämber - 2. Oktober 2016

Zum erschte Mou hei sich d'Trachtelüt amene Mittwoch für d'Sing- und Tanztäg z'Kanderstäg troffe. Es isch üs aune e chly komisch vorcho und mer hei bau es Dürenang mit de Wochetäg übercho. 

Nach dr Begrüessig isch's de grad tifig mit Singe losgange und mer hei mitenang Lieder für s'Unspunnefescht und für e Gottesdienscht ygüebt. Aber ou Lieder zum Thema Stärne und lieblichi Frouechorlieder hei mer glehrt. Jo, sogar e Yblick is Jodle hei mer übercho und gmerkt, dass das e ganz e angeri Gsangstechnik isch, aus dass mer das gwanet si.  

Ou d'Tanzkommission het wieder es abwächsligsrychs Programm zämegstellt und es het für aui öppis derby gha. Verschiedeni Tänz fürs Unspunnefescht und us dr ganze Schwiiz si üs vorgstellt und bybrocht worde.  

Vor em Nachtässe si mer de jewyls rhythmisch gfordert worde. Mit de Füess s'Metrum und mit de Häng e Rhythmusfolg chlopfe, e Linedance zu Rumbamusig oder dr Bärnermutz rhythmisch richtig zämesetze - potz, het das üses Hirni strapaziert! 

Ou nach em Znacht isch es mit Singe und Tanze wytersgange. Wär gnueg het gha, het ou chönne jasse oder byr Bar s'Fyrobebier gniesse und mitenang blöiderle.  

Im Pedro Lenz syni pointierte Morgegschichte hei aube no bym Zmorge für Gsprächsstoff gsorget, wie zum Byspiel, heisst's jetzt "zwe", "zwöi" oder "zwoo"?

So hei mer i dene Täg mit veu Flyss, Elan und Freud d'Lieder und d'Tänz glehrt. Ou weme s'einte oder angere Cherli, Schrittfolge und d'Drähige es paar Mou hei müesse wiederhole bis es ändlich klappet het, ufgä hei mer nie. Mer sie de umso stouzer gsi, we's de gange isch. D'Tanzleiterinne und de Tanzleiter hei mit Geduld und präzise Awysige dür d'Tänz gfüehrt und souffliert. 

Üsi Musikante, d'Yvonne, d'Ursula und dr Stefan, hei unermüedlich gspielt, hei s'glyche Cherli x-Mou im gwünschte Tämpo wiederholt und hei aui üsi Tanzwünsch erfüllt. Es isch es Vergnüege gsi, zu ihrer lüpfige Musig z'tanze. 

Am Samschtignomittag hei mer de Bewohner vom Altersheim wiederum es paar Lieder und Tänz darbote. Ou es paar Passante si spontan blybe stoh und hei intressiert zuegluet. 

Und scho wieder isch de Schlussobe do gsi. Mer hei üsi glehrte Tänz und Lieder de Zueschouer präsentiert und so die Kurstäg Revue passiere lo. Mit verschiedene Byträg isch es zumene bunte Obe worde. 

Es si myner letschte Kanderstägertäg aus kantonali Singleitere gsi. S'Überraschigslied "I wünsche dir Schueh", gsunge vor Tanzkommission, het mi sehr gfreut und ou berüehrt. Danke veumou - der sit es ganz tolls Team! 

Dr Gottesdienscht, wo dr Chor musikalisch mitgstaltet het, isch e würdige Abschluss gsi. Bsunders ds Lied "Du, Gott, bisch min Hirt" us dr Toggeburger Passion, begleitet mit Klarinette und Klavier, het by aune e chly Hüehnerhut gä.

Es si schöni und lehrrychi Täg gsi. Es isch immer e fröhlichi Stimmig gsi und mer hei veu zäme glachet. Ou Trachtelüt wo z'erscht Mou derby gsi si, hei sich sofort wohl gfüehlt.

Näbscht em Neuglehrte hei mer ou die gueti und fründschaftlichi Stimmig mithei gno und mer dänke gärn a die Täg z'Kanderstäg zrügg.

I wünsche aune e gueti Zyt, häbet's guet und uf Wiederluege byr e angere Glägeheit.

Text: Gabriela Moser Regli eui kantonali Singleitere

Bilder: M. Regli / S. Diemi / D. Zaugg

Aus dem Kursprogramm: