ARCHIV - BILDER UND BERICHTE

Sing- und Tanzwochenende in Lyss

12./13., 19./20. und 26./27. Januar 2019


 

Üsi Idrück wie mir z Tanzwuchenend erläbt hei, hei mir versuecht i paar Sätz nider z schribe.

Mir si zwöi Meitschi vom abglägnige, fridleche Dörfli Diemerswil u si dür üsi Grosis ufs Tanze cho. Gmeinsam tanze mir ir Trachtegruppe Zollikofen- Münchenbuchsee.

 

Eini vo üs beidne het ds guete Erläbnis z Lyss scho einisch erlebt und die Zwöiti het dr Wäg das Jahr ou dahere gfunge. Am 26.-27. Januar 2019  het z dritte u somit z letschte Wuchenend statt gfunge. Viu liebi Lüt, gueti Stimmig u schöni Trachte hei üs am Samsti empfange.


Dür d Begrüessig hei mr ds abwächsligsriche und sorgfäutig planete Programm no biz gneuer erfahre. Druf fougend si mir ga singe, was für üs beidi Neuland isch gsi, da mir gwöhnlech nume tüe tanze. D Erfahrig mau imene Chor mit z singe, wo nid nume di glich autrige Schüeler-/inne si, het Spass gmacht.

 

Nachere churze Verschnufpouse hei mir üse Bueb oder üses Meitschi ar Hang gnoh und üs imne grosse Kreis ufgsteut. Zum Atanze hei mir dr Naguschmid usem Repertoire ghout. Idrücklech und cheibe toll isches gsi dä Tanz für einisch mit öppe füf mau so viune Lüt z tanze aus mirs üs gwahnet si.  Die grossi Heruseforderig und z Ziu vom Tag isch üs bekannt gmacht worde, dr  Tanz «Ab id Fäschthötte» zlehre. Mit viune neue Element aber cheibe spannend hei mir de Tanz gfunge. Aber mir müesse zuegä, es het o würklich viu Gedud und Energie kostet bis mir ne de einigermasse i de Bei hei gha.

 

Vorem Znacht het üs d Tanzleitig no dr «Mazurka Retica» zeigt. Dä heimer im Verglich zum Vorigä difig glert und si druf hungrig ga Znacht ässä. Wöu üs dr Mazurka so guet het gfaue wünsche mir üs dä im nächste Programm. Eini vo üs Wiber het du leidr scho wider müesse abhusche.

 

Di angeri het dä fein Härdöpfustock mit em Brate u Gmües gnosse u sech mit de ungerschidleche Lüt vo de vrschidene Trachtegruppe gfröit ungerhaute.  Dr langersehnt Abe isch da gsi, me het wider afa tanze.  D Musig het ihri Instrument ghout und mir hei no ä witere Tanz glehrt. Di usglassnigi Stimmig und di fröhleche Gsichter hei z Herzli fröhlech gstumme. Was i no ha vergesse z erwähne, bim Dessertbuffet wome gfüuht dr ganz Abe het chönne go zueschlah, hets wahnsinnig feini chlini GebäckChugeli mit ärä Vanillesauce dinne gäh. Spät ir Nacht, wo z offizielle Tanze beendet isch gsi, simer im Singsaal no gmüetlech zäme ghocket u nach Lust u Luune no witer tanzet. Zfride und mit trotzdem langsam ufbruchte Energiereserve simer i üsi Zimmer und si glücklech ipfuuset.


Dr Sunntimorge ish gfüuhsmässig sehr schneu da gsi. :-) Nachem z Morge heimer üs gchräftiget wider am singe gwidmet. Weme chli het umegluegt het me vili müedi Gsichter und hie und da mau öpper verschmitzt am giine gseh. Trotzdem heimer flissig versucht dTön z treffe. Und scho hets wider ä chlini Pilgerreis i Ässsahl überegäh. Nachem zMittag heimer de Festwirte us Dank no öppis vorgsunge. Fürmi, aus nid profesionelli Sängerin, hets aso chli viu höchi Tön dinne gha. Zum Abschluss heimer nomau z Tanzbei gschwunge. Obwou mr aui scho chli fuule si gsi, heimr ghorsam vrsuecht di Schritte z verinnerleche. Da me dGsichter vo de awesende Persone langsam chli het kennt heimer no äs Experiment gstartet. Jede Bueb het mit em übernächste und somit amene frömde Meitschi söue tanze. Mou, ds isch meh oder weniger guet gange.

 

Mit emene Lache im Gsicht, müede Chnöi und emene Rucksack vou nöii Erfahrige simer ad Schlussbesprächig.

Mir zwöi Meitschi säge ar Tanz- und Singleitig und aune witere Organisatore vo Herze MERCI.

Sones Tanzwuchenend verbindet u fägt. Mir fröie üs ufs nächste Mau.

 

Text und Fotos: Melanie Reuteler und Susanne Minder